سید ابواعلیٰ مودودی رحمۃ اللہ علیہ کی طویل سوانح حیات

سید ابواعلیٰ مودودی رحمۃ اللہ علیہ کی طویل سوانح حیات۔۔۔۔ترتیب و پیشکش: سید آصف جلال

پیدائش اور خاندان

سید ابوالاعلٰی مودودی کا سنِ ولادت 1321ھ بمطابق 1903ء ہے۔ جائے پیدائش اورنگ آباد دکن ہےاور آبائی تعلق سادات کے ایک ایسے خاندان سے ہے جو ابتداء میں ہرات کے قریب چشت کے معروف مقام پر آکر آباد ہوا تھا۔ اس خاندان کے ایک مشہور بزرگ خواجہ قطب الدین مودود چشتی تھے جو خواجہ معین الدین چشتی اجمیری کے شیخ الشیوخ تھے۔ سید مودودی کا خاندان خواجہ مودود چشتی کے نامِ نامی سے منسوب ہوکر ہی

مودودی کہلا تا ہے۔

انہوں نے جس گھرانے میں آنکھ کھولی وہ ایک مکمل مذہبی گھرانا تھا۔ ان کے والدِ محترم اور والدہ ماجدہ دونوں کی زندگی مذہبی رنگ میں رنگی ہوئی تھی۔ سید مودودی کی تربیت ان کے والد نے خاص توجہ سے کی۔ وہ انہیں مذہبی تعلیم خود دیتے تھے.

اردو، فارسی اور عربی کے ساتھ ساتھ فقہ اور حدیث کی تعلیم بھی اتالیق کے ذریعے گھر پر دی جانے لگی۔ تعلیم کے ساتھ اخلا قی اصلاح کا بھی وہ خاص خیال رکھتے تھے۔ اسی لیے سید مودودی کے والد نے انہیں کسی مدرسے میں داخل نہیں کرایا، بلکہ گھر پر ہی پڑھاتے رہے۔
بتدائی دور کے پورے گیارہ برس انہوں نے اپنے بیٹے کو براہِ راست اپنی نگرانی میں رکھااور کسی مکتب یا مدرسہ میں بھیجنا گوارہ نہ کیا بلکہ ان کی تعلیم کا گھر پر اتالیق رکھ کا انتظام کیا تاکہ مدرسے اور اسکول میں زمانے کی بگڑی ہوئی رو سے وہ اپنے بچے کو بچا سکیں۔
ماحول اور تربیت
سید مودودی کے والدِ محترم نے ان کی تربیت پر خصوصی توجہ دی اور ان کی بہت اچھے اور عمدہ طریقے سے تربیت کی۔ سید صاحب کے گھر میں دہلی کے شرفاء کی صاف ستھری زبان بولی جاتی تھی۔ سید مودودی کے والد نے اس چیز کا بہت خیال رکھا کہ اُن کی زبان پرکوئی غیر مناسب بازاری لفظ نہ چڑھ پائے۔ جب کبھی وہ ایسا کوئی لفظ ان کی زبان پر چڑھا ہوا محسوس کرتے تو ٹوکتے اور صحیح لفظ بولنے کی عادت ڈالتے۔
جہاں تک ذہنی ساخت اورتربیت کا تعلق ہے، سید صاحب کے والد محترم انہیں رات کو اکثر پیغمبروں کے قصے اور تاریخ اسلام کے اہم سبق آموز واقعات سنایا کرتے۔ ہندوستان کی تاریخ کی سبق آموزکہانیاں اور نیک لوگوں کی زندگی کے حالات بتاتے۔ ظاہر ہے کہ ان باتوں کا سید مودودی کے ذہن نے گہرا اثر قبول کیا اور ان میں نیکی، بھلائی،عظمت،بزرگی،اسلام کی سربلندی اور ایثار و قربانی کے جذبات پیداہوئے اور ساتھ ہی ان میں بزرگوں کے نقش قدم پرچلنے کا فطری رحجان بھی پیدا ہوگیا۔
مدرسہ کی تعلیم
سید صاحب کو گیارہ سال کی عمر میں گھریلو تعلیم کی مناسب تکمیل کے بعد مدرسہ فرقانیہ اورنگ آباد کی آٹھویں جماعت میں براہِ راست داخل کیاگیا۔ اس وقت ان کی معلومات تمام مضامین میں اپنے ہم جماعتوں سے بہت زیادہ تھیں، حالانکہ وہ آٹھویں جماعت میں سب سے چھوٹی عمر کے طالب علم تھے۔
مولوی کلاس میں آنے کے بعد سید صاحب کو جدید علوم کیمیا،طبیعیات،ریاضی وغیرہ سے واقفیت اور دلچسپی پیدا ہوئی۔اور پھر جدید معلومات میں بھی وسعت پیدا ہوتی چلی گئی۔
بچپن کے سنہرےدروازے
سید صاحب نے 1914ء میں مولوی کا امتحان دیا اور کامیاب ہوئے لیکن یہ وہ دور تھا جب سید صاحب کے والدِ محترم کی مالی مشکلات بہت بڑھ گئیں تھیں۔ وکالت سے اجتناب اور دینداری میں شدید انہماک کے باعث گھر کے مالی حالات میں وہ اورنگ آباد چھوڑ کر حیدرآباد تشریف لےگئے اور سید صاحب کو مولوی عالم کی جماعت میں داخل کرا دیا۔ اس زمانے میں دار العلوم کے صدر مولاناحمید الدین فراہی تھے جومولانا امین احسن اصلاحی کے بھی استاد تھے۔ سید صاحب کے والد انہیں دارالعلوم میں داخل کراکے خود بھوپال تشریف لے گئے اورسید صاحب دارالعلوم میں زیرِ تعلیم رہے لیکن تعلیم کا یہ سلسلہ چھ ماہ سے زیادہ عرصہ تک جاری نہ رہ سکا، ایک روز بھوپال سے اطلاع آئی کہ سید صاحب کے والد محترم پر فالج کا سخت حملہ ہوگیا ہے۔
چنانچہ مدرسے کی رواجی تعلیم ختم ہوگئی اور ڈیڑھ دوسال کے تلخ تجربات نے یہ سبق سکھایا کہ دنیا میں عزت کے ساتھ زندگی بسر کرنے کے لیے اپنے پاؤں پر کھڑا ہونا لازمی ہے۔
بہرحال والدِ محترم کے انتقال کے بعد سید مودودیؒ کو معاش کی فکر لاحق ہوئی۔ والد محترم کوئی جائیداد چھوڑ کر نہیں گئے تھے۔ یہ کوئی رؤسا کا خاندان نہ تھا نہ دربارداری ان کا پیشہ تھا۔ ان کا خاندان ایک سیدھا سادا دیندار اور شریف خاندان تھا جو جاگیروں پر نہیں بلکہ اپنی قوت بازو پراپنی معاش کی بنیاد رکھتا تھا۔
ذریعہ معاش
والد کے انتقال کے بعد اس چھوٹی سی عمر میں پہلی بار سید مودودی کو بھی احساس ہوا کہ دنیا میں عزت کےساتھ زندگی بسرکرنےکےلئےاپنے پاؤں پر کھڑا ہونا ضروری ہے۔ اللہ تعالیٰ نے انہیں لکھنے کی زبردست قابلیت عنایت فرمائی تھی چنانچہ انہوں نے ارادہ کرلیا کہ قلم کے ذریعے ہی اپنے خیالات کو لوگوں تک پہنچائیں گے اور اسی کو ذریعہ معاش بھی بنائیں گے۔ اس طرح ایک تو مسلمانوں کی بھلائی اور اسلام کی خدمت کاکام ہوگا اور دوسرے معاش کا وسیلہ بھی ہوجائے گاچنانچہ ایک صحافی کی حیثیت سے انہوں نے اپنے کیرئیرکاآغاز کیا اور پھر متعدد اخبارات میں ایڈیٹر کی حیثیت سے کام کیاجن میں اخبار" مدینہ" بجنور(یوپی)"تاج" جبل پور اور جمعیت علماء ہند کا روزنامہ "الجمعیۃ"دہلی خصوصی طور پر شامل ہیں۔ ایک بارمولانا محمد علی جوہر نے بھی سید مودودی کو اپنے اخبار"ہمدرد" میں کام کرنے کی دعوت دی تھی مگر"الجمعیۃ" والوں سے آپ کے پرانے تعلقات تھے،اس لیے آپ مولانا محمد علی جوہرکی پیش کش کو قبول نہ کرسکے۔اگرچہ سیاسی اختلافات کی بنا پر انہیں بعد میں روزنامہ الجمعیۃ کوبھی چھوڑنا پڑا۔ سیاسی تصورات میں سید مودودیؒ مولانا جوہر کے خیالات سےزیادہ ہم آہنگ تھے۔
بچپن میں آپ نے سب سے پہلے علامہ اقبالؒ کی مشہور نظم"شکوہ"پڑھی تھی۔ والد محترم سید احمد حسن صاحب نے آپ کو ہندوستان کی سیاسی تاریخ بھی پڑھا دی تھی۔چنانچہ جب وہ صحافی بنےتوا نہوں نے ملکی حالات کا براہِ راست مطالعہ کیا۔ ویسے بھی ان کا گھرانہ بہت تعلیم یافتہ اور باشعور تھا۔ خاص طور پر انگریزوں سے نفرت تو اس گھر میں بہت زیادہ تھی۔ان وجوہات کی بنا پر اس زمانے میں ہندوستان میں انگریزوں کے خلاف جو تحریکیں اٹھیں مثلاً تحریکِ خلافت، تحریک ستیہ گرہ اور تحریک ترک موالات وغیرہ، سید مودودیؒ نے مسلمانوں کی بھلائی کے خیال سے ان میں بڑھ چڑھ کرحصہ لیا۔ انہوں نے ترک مسلمانوں کی حمایت میں انگریزوں کے خلاف بڑے پُرجوش مضامین لکھے، ہندی مسلمانوں میں جو اخلاقی برائیاں پائی جاتی تھیں انہیں واضح کیا اور اس کے ساتھ ہی مسلمان لیڈروں کی سیاسی غلطیوں سے بھی آگاہ کیا۔ مسلمانوں کی اصلاح اور ترقی کےلیےبہت سے مفید اور قابلِ عمل مشورے دیےاور ہمیشہ مسلمانوں کی اصلاح کےلیےکام کیا۔
اخبار نویسی کے زمانے میں سید مودودی نے اپنی ذاتی کوشش سے انگریزی بھی سیکھ لی اور جدید علوم پڑھنے کے ساتھ ساتھ مختلف اساتذہ سے عربی ادب،تفسیر،حدیث،فقہ، منطق اور فلسفے کی کتابیں بھی پڑھیں۔ اس طرح ان کی علمی قابلیت میں بہت اضافہ ہوگیا اوروہ قدیم اور جدید علوم میں ماہر ہوگئے۔
ہندی مسلمانوں کے حالات سید مودودی کے لیے بہت تکلیف دہ تھے. وہ ان کی بدحالی، بے بسی اور بےحسی پر بہت کڑھتے تھے۔ وہ چاہتے تھے کہ وہ اسلام کے سچے پیروکار بن کر دنیا میں حقیقی اسلامی زندگی کا نمونہ پیش کریں۔ اس زمانے میں انہوں نے ایک مضمون لکھا کہ آج جتنی کمزوریاں بھی مسلمانوں میں پیدا ہوگئی ہیں صرف اس لیے ہیں کہ ان میں سے اسلامی روح نکل گئی ہے اور وہ بھول گئے ہیں کہ مسلمان ہونے کی حیثیت سے وہ کیا ہیں۔ اگر مسلمان اسلام کی پیروی کریں تو ساری دنیا کو مسلمان بناسکتے ہیں اور دنیا میں سب سے زیادہ طاقتور ہوسکتے ہیں۔ چنانچہ وہ مسلمانوں کی بھلائی کی مختلف تدبیروں پر اکثر غور کیاکرتے۔ اسی اثناء میں 1925ء میں جب جمعیت علماء ہند نے کانگرس کے ساتھ اشتراک کا فیصلہ کیا تو سید مودودی نے بطور احتجاج اخبار"الجمعیت" کی ادارت چھوڑ دی اور اس سے الگ ہوگئے۔ اس لیے کہ وہ متحدہ قومیت کے سخت مخالف تھے اور کانگرس کومسلمانوں کے مفادات کے خلاف جماعت سمجھتے تھے۔
پہلی تصنیف
جس زمانے میں سید مودودی"الجمعیۃ" کے ایڈیٹر تھے۔ ایک شخص سوامی شردھانند نے شدھی کی تحریک شروع کی جس کا مقصد یہ تھا کہ مسلمانوں کو ہندو بنالیا جائے۔ چونکہ اس تحریک کی بنیاد نفرت، دشمنی اور تعصب پر تھی اور اس نے اپنی کتاب میں حضورﷺ کی توہین کی تھی جسے کوئی مسلمان برداشت نہیں کرسکتااس لیے کسی مسلمان نے غیرت ایمانی میں آکر سوامی شردھانند کو قتل کردیا۔ اس پر پورے ہندوستان میں ایک شور برپا ہوگیا۔ ہندو دینِ اسلام پر حملے کرنے لگے اور اعلانیہ یہ کہا جانے لگا کہ اسلام تلوار اور تشدد کا مذہب ہے۔ سید مودودی اس صورتِ حال پر بہت رنجیدہ تھے۔ ان کے دل میں اسلام کی محبت اور مسلمانوں کا درد بھرا ہوا تھا۔ اسلام کی خدمت کرنے کے لیے ان کے دل میں بہت اضطراب تھا۔ انہی دنوں مولانا محمد علی جوہر نے دہلی کی جامع مسجد میں تقریر کی جس میں بڑی دردمندی کے ساتھ انہوں نے اس ضرورت کا اظہار کیا کہ کاش کوئی شخص اسلام کے مسئلہ جہاد کی پوری وضاحت کرے تاکہ اسلام کے خلاف جو غلط فہمیاں آج پھیلائی جارہی ہیں وہ ختم ہوجائیں۔ اس پر سید مودودی کو خیال آیا کہ کیوں نہ میں ہی یہ کام کروں۔ چنانچہ انہوں نے "الجہاد فی الاسلام" کے نام سے ایک کتاب لکھی۔اس وقت سید مودودی کی عمر24برس تھی۔ اس چھوٹی سی عمر میں ایسی معرکۃ الآراکتاب آپ کا ایک حیرت انگیز اور عظیم الشان کارنامہ تھا جس پر ہر طرف سے آپ کو داد ملی۔ اس کتاب کے بارے میں علامہ اقبال نے فرمایاتھا:۔
"اسلام کے نظریہ جہاد اور اس کے قانونِ صلح و جنگ پر یہ ایک بہترین تصنیف ہے اور میں ہر ذی علم آدمی کو مشورہ دیتا ہوں کہ وہ اس کا مطالعہ کرے"
اصلاحِ قوم کاعزم
سید مودودی کے دل میں اسلام کا بہت درد تھا اور وہ اس کے لیے دن رات سوچتے رہتے تھے۔ ان دنوں ہندوستان میں مسلمانوں کی حالت آج سے بھی زیادہ خراب تھی۔ سید مودودی مسلمانوں کی اصلاح کرنا چاہتے تھےچنانچہ روزنامہ الجمعیت جو کانگرسی مسلمانوں کا اخبار بن گیا تھا اس کی ادارت اور اخبار نویسی چھوڑکر سید مودودی حیدرآباد دکن چلے گئے۔ حیدرآباد میں قیام کے زمانے میں سید مودودی نے مختلف کتابیں لکھیں، اس کے ساتھ ہی وہ ہندوستان کے سیاسی حالات اور مسلمانوں کی حالت کا بھی گہرا مطالعہ کرتے رہے ، اس دوران وہ قوم کے اصلاحِ احوال کی مختلف تدبیروں پر بھی مسلسل غور کرتے رہے۔ آخر کار انہوں نے اصلاحِ قوم کے مقصد کے لیے 1932 میں حیدرآباد سے رسالہ"ترجمان القرآن"جاری کیا۔ مسلمانوں کی بھلائی کےلیے وہ جو کام کرنا چاہتے تھے ان کے ذہن میں اس کی ترتیب یہ تھی کہ پہلے مسلمانوں کے ذہنوں سے مغربی قوموں کی نقالی اور مرعوبیت،یورپ کے خیالات اور ان کے طور طریقوں کازور توڑا جائے پھر ان کے ذہنوں میں یہ بات بٹھائی جائے کہ اسلام ایک مکمل ضابطہ حیات ہے جو زندگی کے ہر مسئلے میں انسان کی رہنمائی کرتا ہے۔
چنانچہ  1935ء میں آپ نے "پردہ" کے نام سے اسلامی پردے کی حمایت میں ایک شاندار کتاب لکھ کر ان لوگوں کا منہ بند کردیا جو اسلامی پردے پر یورپ سے مرعوب ہوکر طرح طرح کے اعتراض کیا کرتے تھے۔ اس کے علاوہ "تنقیحات" اور"تفہیمات" کے مضامین لکھے جن کے ذریعے انہوں نے تعلیم یافتہ مسلمانوں میں سے فرنگی تہذیب کی مرعوبیت ختم کردی۔
اسلامی قومیت کا نقیب
1938ء میں کانگرس کی سیاسی تحریک اس قدر زور پکڑ گئی کہ بہت سے مسلمان اور خود علماء کرام کی ایک بہت بڑی تعداد بھی ہند وؤں کے ساتھ مل گئی۔ کانگرس یہ کہتی تھی کہ ہندوستان کے مسلمان اور ہندو سب مل کر ایک قوم ہیں۔ یہ ایک ایسی خطرناک بات تھی کہ اگر اسے مان لیا جاتاتو ہندوستان میں مسلمانوں کی علیحدہ حیثیت بالکل ختم ہوجاتی اور ان کا دین بھی خطرے میں پڑ جاتا۔ کانگرس کے اس نظریہ کو "متحدہ قومیت" یا "ایک قومی نظریہ" کانام دیا جاتا تھا۔ سید مودودی نے اس خطرے کی شدت کو محسوس کرتے ہوئے اس کے خلاف بہت سے مضامین لکھے جو کتابوں کی صورت میں "مسئلہ قومیت" اور "مسلمان اور موجودہ سیاسی کشمکش" حصہ اول و دوم کے ناموں سے شائع ہوئے۔ ان مضامین میں سید مودودی نے زور دار دلائل سے ثابت کردیا کہ مسلمان اور ہندو دو الگ الگ قومیں ہیں کیونکہ دونوں کا تصور خدا ، مذہبی عقیدہ، رہن سہن اور طور طریقے سب جدا جدا ہیں۔ انہیں ایک قوم کہنا بالکل غلط بات ہے۔ 1940ء کی قرار داد پاکستان کے بعد مسلمانوں کے بڑےبڑے رہنما اور مسلم لیگ کے دوسرے لیڈر بھی یہی بات کہنے لگے ۔ اسے"دو قومی نظریہ"کہاجاتا ہے۔ سید مودودی نے مسلمانوں کی علیحدہ قومیت کے نظریے کو اتنے اچھے اور عمدہ طریقے سے پیش کیا کہ اس خوبی کے ساتھ اب تک کوئی اور شخص مسلمانوں کے علیحدہ قومی تصور کی مدلل وکالت نہیں کرسکا تھا۔ سید مودودی نے قرآن و حدیث سے دلائل دیے۔ تمام مسلمان لیڈر سید مودودی کی ان کتابوں پر بہت خوش ہوئے اور مسلم لیگ نے انہیں بار بار چھپوا کر عام مسلمانوں میں خوب پھیلایا۔ ان مضامین سے مسلم لیگ کے علیحدہ پاکستان کے مطالبے کو بہت مدد ملی۔ اس طرح سید مودودی پہلے شخص تھےجنہوں نےنظریہ پاکستان کو علمی سطح پر دلائل کے ساتھ پیش کیااور پاکستان کے حق میں دو قومی نظریہ کے لیے زبردست عقلی اور اسلامی دلائل فراہم کے۔ ان دلائل کا کانگرس کے ساتھ وابستہ علماء کے پاس بھی کوئی جواب نہ تھا۔ اس کے بعد پاکستان کا تصور مسلمانوں میں پختہ ہوگیا اورمسلم لیگ کے علیحدہ اسلامی اور قومی وطن کی مہم کو سید مودودی کے ان دلائل سے زبردست تقویت ملی۔ اب یہ مضامین"تحریک آزادی ہند اور مسلمان" کے نام سے چھپ چکے ہیں۔ پاکستان کے حق میں سید مودودی کی یہ زبردست خدمت ہے جو انہوں نے علمی میدان میں سرانجام دی ۔
اصلاحِ ملت کے لیےجماعت اسلامی کا قیام
1935ء سے 1947ء کے درمیانی دور میں ہندوستان کے حالات بہت نازک تھے۔ خصوصاً مسلمان بہت پریشان تھے۔ مسلمانوں کے مقابلے میں ہندؤں کی تعداد زیادہ تھی اور ان کی طاقت اوراثرورسوخ بھی مسلمانوں سے کہیں زیادہ بڑھا ہوا تھا، دوسری طرف ہندوستان کی آزادی کے لیے بھی کوشش ہورہی تھی،اگر انگریز ہندوستان کو اکثریت کے حوالے کر کے جاتے اوروہاں ہندوؤں کی حکومت بن جاتی تو پھر مسلمانوں کی قابلِ رحم حالت کا اندازہ لگانا کچھ زیادہ مشکل نہ تھا،اگر انگریز مسلم لیگ کے مطالبے کو مان لیتے اور پاکستان بن جاتا، تو سوال یہ تھا کہ ہندوؤں کے ماتحت ہندوستان میں رہ جانے والے تقریباً ایک تہائی مسلمانوں کی حالت کیا ہوگی اور وہ کس طرح زندگی بسر کریں گے اور ان کا سیاسی سہارا کون ہوگا۔ اس کے علاوہ پاکستان میں ایک اسلامی حکومت کے قائم ہونے کی کیا امید تھی کیونکہ جولوگ پاکستان کی تحریک چلا رہے تھے ان میں چند لوگوں کو چھوڑ کر باقی سب وہ تھے جو اپنی عملی زندگی میں اسلام کے بنیادی فرائض بھی پورے نہیں کرتے تھے۔ اس لیے ایسی کسی ٹیم کے ذریعے پاکستان میں اسلامی نظام کا قیام ممکن نظر نہ آتا تھا۔ چنانچہ سید مودودیؒ کے اس اندیشے کوبعد کے زمانے نے سو فیصدی سچا بھی ثابت کردیا۔ ان حالات کی روشنی میں مسلمانوں کو ایک ایسی جماعت کی اشد ضرورت تھی جو انہیں آنے والے خطرات اور مشکلات کا مقابلہ کرنےکےلیے تیار کرے۔ جو تقسیم کے بعد ہندوستان میں مسلمانوں کو سنبھالے اور جو پاکستان بن جانے کے بعد وہاں اسلامی حکومت قائم کرنے کی کوشش کرے اور اگر ملک تقسیم نہ ہوتومسلم لیگ کی ناکامی کے بعد مسلمانوں کی دوسری دفاعی لائن ثابت ہوسکے۔ چنانچہ سید مودودی نے ترجمان القرآن کے ذریعے ایک پابندِ اسلام جماعت کے قیام کی تجویز پیش کی اور اس سلسلے میں ترجمان القرآن میں مضامین بھی شائع کیے۔ جو لوگ اس تجویز سے اتفاق رکھتے تھے وہ 26 اگست 1941 ء کولاہور میں جمع ہوئے اور"جماعت اسلامی" قائم کی گئی، جس کامقصد قرآن پاک کے الفاظ میں یہ تھا۔
ان اقیمو الدین ولَاتتفرّقُوا فیہ
"یعنی آپس میں اکٹھے ہوکراللہ کے دین کو قائم کرو"
جس وقت جماعت اسلامی قائم ہوئی تو اس میں پورے ہندوستان میں سے صرف 75 آدمی شامل ہوئے تھے۔ اس اجتماع میں سید مودودی کو جماعت کا سربراہ منتخب کیاگیا۔
حمایت پاکستان
سید مودودی نے جماعت اسلامی قائم کرنے کے باوجود کانگرسی مسلمانوں کی طرح پاکستان کی مخالفت نہیں کی بلکہ اپنا سارا زور مسلمانوں کواصلی مسلمان بنانے پر صرف کیا۔ ایک طرف پاکستان کےقیام کی کوششیں ہورہی تھیں۔ دوسری طرف سید مودودی اور جماعت اسلامی کے لوگ ایک تبلیغی جماعت کی طرح اسلام کی تعلیمات عام کرنے کے لیے کام کر رہے تھے اور مسلمانوں کو خلافتِ راشدہ کے نظام کو بحال کرنے کے لیے ابھار رہے تھے۔ سب جانتے ہیں کہ مسلمان قوم پاکستان بھی اسی لیے حاصل کرنا چاہتی تھی کہ یہاں اسلام کی حکومت قائم کی جائے۔ اس طرح جماعتِ اسلامی اور سید مودودی پاکستان کو اسلام کی بنیادپرمضبوط کرنے کے لیے کام کر رہے تھے۔ اس سے پہلےوہ نظریہ پاکستان کی حمایت میں بھی پُرجوش مضامین اور کتابیں لکھ چکےتھےاورکانگرس کے ایک قومی نظریہ کےپر خچےاڑا چکے تھے۔ سید مودودی نے کانگرس کے اس نظریہ کہ "اقوام اوطان سے بنتی ہیں" کی دھجیاں بکھیر دیں اور بڑے بڑے کانگریسی علماء ان دلا ئل کے سامنے گنگ ہوگئے۔
سید مودودی پاکستان میں
مسلمانان پاکستان کی یہ خوش قسمتی ہے کہ تقسیمِ ملک کے وقت سید مودودی ہندوستان سے منتقل ہوکر پاکستان میں تشریف لے آئے،لیکن یہاں آکر بھی انہوں نے کمانے، جائیدادیں بنانے یا عہدے حاصل کرنے کی فکر نہیں کی۔ان کو فکر پاکستان کی تھی اور پاکستان کے لیے اسلام کی تھی۔
پاکستان میں پہنچتے ہی سید مودودی نے سب سے پہلا کام یہ کیا کہ انہوں نے پنجاب کے اس وقت کے وزیر اعلٰی سے رابطہ قائم کیااور انہیں مشورہ دیا کہ وہ پٹھان کوٹ سے کشمیر کو جانے والی سڑک پر فوراً قبضہ کرنے کا بندوبست کریں، کیونکہ اگر اس سڑک پر پاکستان نے قبضہ کرلیا تو پھر ہندوستان کےلیے کشمیر کاراستہ بند ہوجائےگا اور کشمیر پر اس کے حملے اور قبضہ کا کوئی امکان باقی نہیں رہے گا لیکن افسوس کہ حکومت نے اس مفید تجویز کی طرف کوئی توجہ نہ دی اور دور اندیشی سے کام نہ لیا جس کانتیجہ یہ ہوا کہ کشمیر حاصل کرنے کا ایک مفید اور بہترین موقع پاکستان کے ہاتھ سے نکل گیا۔ اس وقت نئی حکومت مہاجرین کے مسئلے میں زیادہ مصروف تھی یا شاید اسے صحیح اندازہ نہیں تھا کہ سید مودودی کا مشورہ کتنا قیمتی اوربروقت تھا. اس پر عمل درآمد سے پاکستان کا دردِ سرختم ہوجاتا اور45لاکھ کشمیری مسلمانوں کوآزادی مل جاتی۔ اگر ان کی بات کو بروقت مان لیا جاتا توآج کشمیر پاکستان کے قبضے میں ہوتا۔
قائد اعظم اور سید مودودی
قائداعظم سید مودودی کو ایک نیک مخلص،دیانتداراورقابل انسان سمجھتے تھے۔ قائد اعظم کی علامہ اقبال کے ساتھ بھی دوستی تھی،دونوں ہندوستانی مسلمانوں کی آزادی اور پاکستان کے حصول کےلیے آپس میں صلاح مشورے کیاکرتےتھے۔ قائد اعظم، علامہ اقبال کی بڑی عزت کرتے تھے اور ان کی باتوں کو بہت اہم سمجھتے تھے۔ انہیں معلوم تھا کہ اقبال ہی نے سید مودودی کو حیدر آباد دکن سے پنجاب بلایا تھا چنانچہ ایک دفعہ جب ابھی پاکستان نہیں بنا تھا، لوگوں نے قائد اعظم سے پوچھا کہ مودودی کیسا آدمی ہے تو قائد اعظم نے جواب دیا کہ وہ بہت مخلص،نیک اور قابل شخص ہے۔ مسلم لیگ پاکستان بنائے گی، اور جب پاکستان بن جائے گا توپھر ہمارے لیے سب سے بڑا مسئلہ یہ ہوگا کہ پاکستان کو اسلامی سلطنت کیسے بنائیں۔ سید مودودی اور ان کی جماعت اسلامی اس وقت کی تیاری کررہی ہے۔ اس لیے وہ بہت ہی ضروری اور مفید کام کر رہے ہیں۔ یہی بات قائداعظم نے جماعت اسلامی کے ایک وفد سے دہلی میں بھی کی تھی،جب جماعت اسلامی کا وفد قائد اعظم سے ملا، اور ان کے سامنے جماعت اسلامی کے اغراض و مقاصد پیش کیے تو قائد اعظم نے فرمایا:
"مسلم لیگ ہنگامی حالات سے دوچار ہے اور ضروری کام میں مصروف ہے البتہ جب پاکستان قائم ہوجائے گا تو جماعت اسلامی کاکام شروع ہوجائےگا۔"انہوں نے جماعت اسلامی کے کام کوبھی پسند کیاتھا۔
اسلامی نظام کے راستے کی رکاوٹیں
پاکستان میں اسلامی نظام کا مطالبہ اور وہ بھی مسلمان حکمرانوں سے اگرچہ تعجب کی بات تھی لیکن وہ بھی سید مودودی کو مہم بنا کر اٹھانا پڑا چونکہ حکمران اس پر آمادہ نظر نہ آتے تھے۔ یوں تو مسلمان اسلام کا شیدائی ہوتا ہے لیکن سید مودودی نے جب اسلامی نظام کا مطالبہ پاکستان میں کیا تو اس کے بجائے کہ پاکستان کی حکومت اس کام کو فوراً کرتی اور سید مودودی کاتعاون حاصل کرتی اس نے اسلام کے لیے حاصل کیے ہوئے پاکستان میں اسلامی نظام کا مطالبہ کرنے کی یہ سزا سید مودودیؒ کو دی کہ انہیں گرفتار کرکے جیل میں ڈال دیاگیا۔ یہ بڑی زیادتی تھی جب تک قائد اعظم زندہ رہے انگریز کے تربیت یافتہ افسر اور لیڈر سید مودودی کے خلاف کچھ نہ کر سکے مگر جب قائد اعظم فوت ہوگئے تو ان کی وفات کے چند دن بعد ہی سید مودودی اور ان کے ساتھیوں کواکتوبر1948ء میں اسلامی نظام کا مطالبہ کرنے کے جرم میں گرفتار کرلیاگیا۔ گرفتاری سے ایک ڈیڑھ ماہ پہلے ان کی جماعت کے اخبارات"کوثر"جہان نو اور روزنامہ "تسنیم"بھی بند کردیے گئے تاکہ کوئی آوازِاحتجاج بلند نہ ہو۔
زندگی کی پہلی جیل
اسلامی نظام کا مطالبہ اٹھانے کے جرم میں سید مودودی کو گرفتار کیاگیا لیکن الزام یہ دھرا گیا کہ وہ جہادِ کشمیر کے مخالف تھے۔ اس جیل جانے کی روداد انہوں نے خود ہی ایک مجلس میں بیان کی جو انہیں کے الفاظ میں درج کی جاتی ہے۔
"دراصل میرے اسلامی نظام کے مطالبے کو دبانے کےلیےہی میرے خلاف مختلف کارگزاریاں کی جاتی رہی ہیں۔ کبھی میری کردار کشی کی گئی اور کبھی مجھ پر سیاسی بہتان لگائے گئے لیکن اللہ کا شکر ہے کہ ایسی کوئی چیز کبھی بھی مجھے میرے مؤقف سے نہیں ہٹا سکی۔ جب قرار داد مقاصد پاس ہوئی تواس کا متن مجھے ملتان جیل میں پہلے دکھایا گیا تھا لیکن میرے مطالبات کو تسلیم کرلینے کے باوجود حکومت میری نظر بندی میں بار بار چھ چھ ماہ کی مسلسل توسیع کرتی رہی۔ میری نظربندی میں چوتھی بار توسیع ہوچکی تھی جب بائیں بازو کے ایک دانشور کی درخواست پر عدالت نے یہ فیصلہ سنایا کہ کسی کی نظر بندی کو تین بار سے زیادہ توسیع نہیں دی جاسکتی۔ میں سمجھتا ہوں کہ اگر یہ درخواست میری طرف سے کی جاتی تو فیصلہ شاید وہ نہ ہوتا جو اب ہوا تھا۔ بہر حال بائیں بازو کے ایک نظربند کے صدقےپاکستان کو یہ نعمت نصیب ہوئی کہ اٹھارہ ماہ سے زیادہ کسی کو نظر بند نہیں رکھا جاسکتااور اس طرح میں بیس ماہ کے بعد1950ء میں رہاہوا"
اپنی پہلی قید و بند کے بارے میں اپنے تجربے کا ذکر کرتے ہوئے سید صاحب نے فرمایا:۔
"میں نے اپنی پہلی نظر بندی میں لکھنے پڑھنے کاخاصا کام کیا۔ مسئلہ ملکیت زمین مرتب کی،تفہیم کامقدمہ لکھا، حدیث کی کتاب ابوداوٗد کا انڈکس تیارکیا، کتاب "سود" اور اسلام اور جدید معاشی نظریات بھی وہیں مکمل کیں۔ خدا کا شکر ہے کہ میرا وہاں ایک دن بھی ضائع نہ ہوا"
سید مودودی کی گرفتاری رنگ لائی اور مارچ49ء میں قرار داد مقاصد پاس ہوگئی۔ اس طرح یہ بات مان لی گئی کہ پاکستان میں اسلامی قوانین کا ہی نفاذ ہوگا۔
قادیانی سازش
اسلامی جمہوریہ پاکستان میں اشتراکی سازش کے بعد  1953 ء میں ملک میں پہلی قادیانی سازش ہوئی. مسلمانوں کا مطالبہ تھا کہ قادیانیوں کو غیر مسلم اقلیت قرار دیاجائے لیکن حکومت کے مخصوص عناصراور قادیانیوں نے ملک میں مارشل لا نافذ کردیا تاکہ ایسا مطالبہ اٹھانے والوں سے انتقام لیا جاسکے۔ اسلامی نظام کا راستہ روکنےکا یہ حکومت کادوسرا حربہ تھا۔
اس موقع پر سید مودودی نے "قادیانی مسئلہ"کے نام سے ایک چھوٹی سی کتاب لکھ کراصل مسئلے کو واضح کردیا اور ساتھ ہی اپیل کی کہ یہ ایک دستوری مسئلہ ہے اس پر فساد اور خون خرابے کی ضرورت نہیں ہے۔ اسے دستور کے ذریعے حل کیاجائےلیکن حکومت تو خود فساد کرنے پرتُلی ہوئی تھی چنانچہ اس نے بڑے پیمانے پر فسادات کرائے۔ ہزاروں مسلمانوں کو گرفتار کرکے جیلوں میں بند کیا اور اس طرح مسلمانوں کو بتا دیا کہ ان کے لیے دین کی بنیاد پرکوئی مطالبہ اٹھانا اور حکومت سے منوانا ممکن نہیں ہے۔ جولوگ ملک میں دین کانام لیں گےانہیں سزا ملے گی۔
دارو رسن کی آزمائش
حکومت کے بے دین افسروں نے قادیانی مسئلے پر فسادات سے خوب فائدہ اٹھایا. حکومت اور اس کے افسر تو سید مودودی سے پہلے ہی ناراض تھےانہوں نے سید مودودی کو بھی قادیانی مسئلہ نامی کتابچہ لکھنے کے جرم میں گرفتار کرلیا اور پھرفوجی عدالت کے ذریعے انہیں یہ کتابچہ(جو ہر جگہ فروخت ہورہا تھااور اب تک فروخت ہورہاہے اور کبھی خلافِ قانون نہیں ہوا) لکھنے کے جرم میں سزائے موت کا حکم سنادیا۔ یہ حکومت کابدترین جرم تھا وہ تمام لوگ جواسلام اور پاکستان کے مخالف تھے اور نہیں چاہتے تھے کہ پاکستان ایک اسلامی ریاست بن جائے حکومت کی اس کارروائی سے بہت خوش ہوئے کہ پاکستان میں اسلام کے سب سے بڑے سپاہی کو ختم کیاجارہاتھا۔ مگر عام مسلمان تو صدق دل سے اسلام کو پسند کرتے تھے اور اس کارروائی کو جرم کہتے تھے۔ سید مودودی کی سزا کی خبر سن کر انہیں بہت افسوس اور دُکھ ہوا۔ پورے ملک میں حکومت کے اس فیصلے پر ناراضگی کی زبردست لہر دوڑ گئی۔ بڑے بڑے شہروں اور چھوٹے چھوٹے قصبوں تک میں ہرجگہ ہڑتالیں ہوئیں، جلوس نکلے،جلسےہوئے۔ حکومت کوتار اورخطوط بھیجے گئے۔ پاکستانی اخبارات اور رسائل کے ایڈیٹروں نے ایک مشترکہ بیان میں اس فیصلے پر حکومت سے سخت احتجاج کیا۔ پاکستان کے وکیلوں،طالب علموں،اساتذہ اور دوسرے مختلف طبقوں کی انجمنوں اور مجلسوں نے بھی سید مودودی کو سزائے موت کا حکم سنائے جانے پر حکومت کے خلاف سخت ناراضگی اور غم وغصے کا اظہار کیا اور ان کی رہائی کا مطالبہ کیا۔ ملک کے اندر اور باہر عالم اسلام کی بے شمار شخصیتوں اور اخبارات نے نام نہاد فوجی عدالت کے حکم کو جو کہ ایک سیاسی انتقام تھا غلط قراردیا اور اس سزا کو منسوخ کرنے کا مسلسل مطالبہ کیا۔ ساری دنیا کے مسلمانوں نے حکومت پاکستان کو احتجاجی تار دیے۔ غرض اتنا زبردست احتجاج کیا گیا کہ ہند و پاکستان کی تاریخ میں ایسی کوئی مثال نہیں ملتی۔ پاکستان کے علاوہ دوسرے ملکوں سے بھی بڑے بڑے علماء اور مسلم لیڈروں نے حکومت پاکستان پر اس سزا کی وجہ سے سخت ناراضگی کا اظہار کیا اوراس سزا کو منسوخ کرنے کا مطالبہ کیا۔ یہ سزا حیرت ناک اور غیر متوقع تھی اور خالص سیاسی وجوہ کی بنا پر دی گئی تھی، جو سراسر ظلم پر مبنی تھی۔
مولانا مودودی کی سزائے موت پر عالم اسلام کا احتجاج و اضطراب
سید مودودی کو موت کی سزا کا حکم کوئی معمولی بات نہ تھی اس پر ہرانسان تڑپ اٹھا، ہر مسلمان چیخ اٹھا، لوگ دھاڑیں مارمار کر رونے لگے۔ سارے عالم اسلام میں اضطراب پھیل گیا،ہرشخص سراپا احتجاج بن گیا۔
مصر کی سب سے بڑی اسلامی جماعت الاخوان المسلموں کے رہنما اور ایک بہت بڑے قانون دان علامہ حسن الہضیبی نے حکومت پاکستان کو ایک تار روانہ کیا جس میں لکھا تھا"سیدابو الاعلٰی مودودیؒ کی سزا کا حکم دراصل تحریک اسلامی کو سزا دینے کے برابر ہے۔ یہ ایک بہت بڑا جرم ہے. اقصائے عالم کے سارے مسلمان اس حکم کو نفرت و بیزاری کی نگاہ سے دیکھتے ہیں اور اس کی تنسیخ کا مطالبہ کرتے ہیں کیونکہ پاکستان کے ساتھ مسلمانان عالم کی ہمدردیاں اور روابط اسلام کی اساس پر قائم ہیں۔ عالم اسلام کے ایک اور ممتاز عالم حضرت علامہ نور المشائخ المجددی نے بھی کابل سے ایک تار بھیجا جس میں لکھا تھا:
"سید مودودی کا شمار جلیل القدر علمائے دین میں ہوتا ہے۔ علمائے حق میں سے ایک دینی شخصیت کی سزا درحقیقت سزا کے روپ میں دین کی توہین وسزاہے"
لجزائر کے علماء نے سید مودودی کی سزائے موت پرایک بیان میں کہا :
" سید مودودی کو سزائے موت کا حکم محض ایک فرد بشر کی موت کافیصلہ نہیں ہے بلکہ اسلام کی تلواروں میں سے ایک تلوار کو توڑ دینا ہے۔ اسلام کی آوازوں میں سے ایک آواز کو خاموش کردینا ہے اور اسلام کے وقار و اعزاز کو مٹادینا ہے۔ ہم جمعیۃ العلماء الجزائرکی جانب سے اور مغرب اقصٰی کے تین کروڑ مسلمانوں کی طرف سے مولانا مودودی کی سزائے موت اورسزائےقید کے احکام فی الفور واپس لینے کی درخواست کرتے ہیں"
انڈونیشیا کی ساٹھ مسلم جماعتوں نے اپنے بیان میں کہا :
"مولانا مودودی صاحب کی اگر پاکستان کو ضرورت نہیں تو دنیا ئے اسلام کو ان کی زبردست ضرورت ہے. ہم انڈونیشیا کے مسلمان ان کے ساتھ ہیں اور ان کے خیالات کی آج مسلم دنیا کو اشد ضرورت ہے۔ مولانامودودی دنیائے اسلام کی قیمتی امانت ہیں"
فلسطین کے مفتی اعظم الحاج محمد الحسینی نے پاکستان کے گورنر جنرل اور وزیر اعظم کے نام ایک تار بھیجا جس میں درج تھا:
"الاستاذ سیدابوالاعلٰی امیر جماعت اسلامی پاکستان کے متعلق سزا کی خبر نےان تمام مسلمانوں کو جنہیں پاکستان سے محبت ہے اور جو پاکستان سے اچھی توقعات رکھتے ہیں، شدید صدمہ پہنچایا ہے۔ ہم امید کرتے ہیں کہ حکومت پاکستان دانشمندی سے کام لے گی اور استاذ مودودی کی سزا کو فوراً منسوخ کردے گی"
افغانستان کے مشہور عالم نور المشائخ ملا شور بازارنے تار میں کہا:۔
"مولانا مودودی کی سزا کا حکم شریعت اسلام سے علانیہ بغاوت ہے اور ان باطل پرستوں کی ہمت افزائی ہےجو اسلام کے خلاف نبردآزما ہیں"
شیعانِ عراق کے مجتہد اعظم حضرت الامام محمد الخاص اور عراق کے اہل سنت والجماعت کے پیشوائے اعظم علامہ الزہادی نے عراق،سعودی عرب،مصراور ایران کے حکمرانوں کوایک تار بھیجا جس میں ان سے درخواست کی گئی تھی کہ وہ مولانا مودودی کی سزا منسوخ کرانے کی کوشش کریں۔
دمشق(شام)میں پاکستانی سفارت خانے کے سامنے شامیوں نے سید مودودی کی سزا کے خلاف مظاہرے کیے۔ ماریشیس کے مسلمانوں نے بھی تاروں اور خطوط کے ذریعے حکومت پاکستان سے زبردست احتجاج کیا۔
سید مودودی کی جیل میں استقامت و پامردی
سید مودودی کی سزا کے خلاف دنیا بھر میں تو اس قدر احتجاج ہو رہا تھامگر سید مودودی کو فوجی عدالت کے اس فیصلے پر ذرہ برابر بھی گھبراہٹ نہیں تھی . جب ان کے ساتھیوں نے جیل میں ان سے پوچھا کہ کیا حکومت کے فیصلے کے خلاف آپ کی طرف سے رحم کی اپیل دائر کی جائے تو انہوں نے پھانسی کی کوٹھڑی میں کھڑے ہوکر فرمایا:
"نہیں،ہرگز نہیں۔ میں نہیں چاہتاکہ میری طرف سے یا میرے خاندان کے کسی فرد کی طرف سےیا خود جماعت کی طرف سےکوئی رحم کی درخواست پیش کی جائے"
اس کے بعد انہوں نے اپنے بیٹے عمرفاروق کو تسلی دیتے ہوئےفرمایا"بیٹا ذرانہ گھبرانا! اگرمیرے پروردگار نے مجھے اپنے پاس بلانا منظورکرلیا ہے تو بندہ بخوشی اپنے رب سے جاملے گا اور اگر اس کا ہی ابھی حکم نہیں آیا تو پھر چاہے یہ لوگ الٹے لٹک جائیں مجھ کو نہیں لٹکا سکتے"
چنانچہ سید مودودی نے اپنی سزا کے خلاف کوئی اپیل نہیں کی۔ انہوں نے کہا اگر میں ظالم حکمرانوں کے سامنےدب گیا،اور اپیلیں کرنے لگا تو پھر اس ملک سے انصاف کا جنازہ اٹھ جائے گا۔ بالآخر حکومت نے خود ہی سزائے موت کوچودہ سال کی قید میں تبدیل کردیا۔
سید مودودی کے ساتھی تو کچھ عرصے کے بعد جیل سے رہا کردیے گئے اور انہوں نے واپس آکر دین کے کام کو آگے بڑھایا لیکن سید مودودی کو مزید دوسال اور گیارہ ماہ تک جیل میں رکھا گیا،اور بالآخر وہ عدالتِ عالیہ کے ایک حکم کے ماتحت ہی رہا ہوئے۔
روداد زنداں
دوسری بار جیل جانے کی روداد اور اس کی وجوہ کا تذکرہ کرتے ہوئے سید مودودی نے ایک مجلس میں بتایا۔
"یہ غلط فہمی ہے کہ مجھے قادیانی مسئلےکے فسادات کے سبب گرفتار کیاگیا ، حقیقت یہ ہے کہ وہ قید بھی اسلامی دستور کی جدوجہد ہی کی ایک سزا تھی جس کے لیےپہلا بہانہ ملتے ہی فائدہ اٹھایا گیا۔ یہ سازش اس لیے کی گئی تھی کہ اس ملک میں سے اسلام اور جمہوریت دونوں کو بیک وقت رخصت کردیا جائے۔ ظاہر ہے کہ قرار داد مقاصد پاس ہونےکے بعد بھی اسلامی دستور بنانے کی کوئی سنجیدہ کوشش نہیں کی گئی۔ چنانچہ جماعت اسلامی نے باقاعدہ طور پر حکومت سے مطالبہ کیا کہ دسمبر52ء کے ختم ہونے سے پہلے پہلے ملک کو دستور دیاجائے اوراس دستور میں جماعت اسلامی کے آٹھ نکات ضرور شامل ہوں۔ وہ آٹھ نکات یہ تھے۔
1 ۔   ملک کا قانون اسلامی شریعت کے مطابق ہوگا۔
2.  کوئی ایسی قانون سازی نہیں کی جائے گی جو قانونِ شریعت کے خلاف ہو.
3. تمام ایسے قوانین کو منسوخ کیاجائےگا جو شریعت کے احکام یا اصولوں سے متصادم ہوں۔
4۔  حکومت کے لیے لازم ہوگا کہ وہ ان برائیوں کو مٹائے جنہیں اسلام مٹانا چاہتا ہے اوران بھلائیوں کوفروغ دے جنہیں اسلام فروغ دینا چاہتا ہے۔
5۔   لوگوں کی شہری آزادیوں کو ان کا جرم کھلی عدالتوں میں ثابت کیے بغیر اور انہیں صفائی کا موقع دیے بغیر، سلب نہیں کیاجائے گا۔
6۔   لوگوں کو حق ہوگا کہ انتظامیہ یا مقننہ اگر اپنے حدود و اختیارات سے تجاوز کریں تو وہ ملک کی عدالتوں سے قانونی چارہ جوئی کرسکیں۔
7 ۔    عدلیہ انتظامیہ کی مداخلت سے آزاد ہوگی۔
8 ۔   حکومت اس بات کی ضامن ہوگی کہ ملک میں کوئی شخص بنیادی ضروریات زندگی یعنی غذا،لباس مکان اورعلاج سے محروم نہ رہے۔
سب کی مراد اسلامی دستور
جماعت اسلامی اور سید مودودی کی طویل جدوجہد بالآخر رنگ لائی ۔ سید مودودی کی کوشش اور عوام کے مطالبے پر ملک کی دستور ساز اسمبلی نے سید مودودی کے دیے ہوئے نشانات کی بنیاد پر ایک اسلامی دستور ترتیب دیا ۔
جماعت اسلامی جو سید مودودی کی راہنمائی میں اسلامی دستور کا مطالبہ مدت سےکر رہی تھی ، اس کی کوشش کامیاب ہوگئی۔ چودھری محمد علی وزارت عظمی کے دور میں پاکستان کا اسلامی دستور 23مارچ1956ء کو ملک میں نافذ ہوگیا۔ یہ دستور کچھ نقائص کے باوجود بڑی حد تک اسلامی دستور ہی تھا، اور تمام تر جماعت اسلامی اورسید مودودی کی کوششوں کو نتیجہ تھا۔ اگر سید مودودی اور جماعت اسلامی قیام پاکستان کے فوراً بعد اسلامی دستور کی کوشش شروع نہ کرتے اوراسلامی نظام کے لیے قربانیاں بھی پیش نہ کرتے، جیل نہ جاتے، عوام میں بیداری پیدا نہ کرتے تو کون کہہ سکتا ہے کہ 1956ء میں پاکستان کا دستور ایسا اسلامی بن جاتا، جس وقت اسمبلی یہ دستور بنا رہی تھی تو جماعت اسلامی نے ملک میں اسلامی دستور کی زبردست مہم چلا رکھی تھی. اسی وجہ سے عام لوگوں نے بھی حکومت پر دباؤ ڈالا کہ وہ دستور کو اسلامی بنائے۔ یہ دستور جب نافذ ہوا تو پورے ملک میں چراغاں کیاگیا۔ عوام نے خوشیاں منائیں، سارے مسلمان ملکوں کی طرف سے سید مودودی کو بھی مبارکباد کے پیغامات آئے اور پاکستان کی عزت اور وقار میں بہت اضافہ ہوگیا۔ صدیوں کے بعد ایک مسلمان ملک میں اسلامی دستور نافذ ہوا تھا۔
جبرو تشدد کی طویل اندھیری رات
نیا دستورتوبن گیا لیکن ملک کے اندر اسلام کے دشمنوں،بے دینوں اور مغربی تہذیب کے متوالوں کے سینے پر سانپ لوٹ گیا۔ سوشلسٹوں کے تن بدن میں آگ لگ گئی   بے دین سرکاری افسر سخت ناراض ہوگئے۔ غیر اسلامی ملکوں میں پاکستان کے خلاف سازشیں بڑھ گئیں اور کفر تڑپ کر رہ گیا۔
نئے دستو کے تحت ملک میں عام انتخابات کی تیاریاں جاری تھیں لیکن دوسری طرف ملک اور اسلام کے دشمنوں نے سازشیں شروع کردیں اور پھر 58ء کے اکتوبر میں ایک سازش کے ذریعے ملک میں فوجی راج نافذ کردیاگیا۔ فوج کے سربراہ ایوب خان نے یہ حرکت کی تھی۔ جس کے ذمے ملک کی سرحدوں کی حفاظت کرنا تھا اسی نے ملک پر فوجی قبضہ کرلیا۔ اسمبلیاں توڑ دیں، جمہوری ادارے ختم کردیےاورا اپنی ہی قوم پر دشمن فوجوں کی طرح مارشل لاء نافذ کرکے دستور کو منسوخ کردیا۔ ساتھ ہی سب سیاسی جماعتوں پر بھی پابندی لگادی۔ یہ سب کچھ اس لیے کیا گیا تھا کہ ملک میں اسلامی نظام نہ آئے اور اس کے راستے میں رکارٹ ڈالی جائے۔ ظاہر ہے کہ اسلام کے قانون سے خوفزدہ لوگوں نے اسلامی نظام سے بچنے کے لیے ہی یہ کارروائی کی تھی، یہ مارشل لا مسلسل چوالیس ماہ تک ملک میں نافذ رہا۔ اس عرصے میں سید مودودی اپنے علمی کاموں میں مصروف رہے اور حق بات کا اظہار جرأت سے کرتے رہے ۔ صدر ایوب خاں نے بہت سے ایسے قدامات کیے جو اسلامی اور شرعینقطہ نظر سے بالکل ناجائز اور غلط تھے۔ اس نے قرآن و سنت کے خلا ف عائلی قوانین اورخاندانی منصوبہ بندی نافذ کردی، سید مودودی نے حکومت کی ان سب غیر اسلامی کارروائیوں کی سخت مذمت کی اور آگاہ کیا کہ یہ کارروائیاں ملک کی سلامتی اور مسلمانوں کے اتحاد و تعاون کے لیےسخت نقصان دہ ثابت ہوں گی۔ سید مودودی نے ایوب خاں کی تمام غیر اسلامی باتوں کی سخت مخالفت کی اور قرآن و سنت کے حوالوں سے ان اقدامات کو ناجائز اور غیر اسلامی ثابت کیا۔ اس پرایوب خاں بہت ناراض ہوا اور سید
مودودی کی کتاب"ضبط ولادت"کوضبط کرلیا۔ اس نے اپنے دور میں اور بھی بہت سی سختیاں کیں یہاں تک کہ اس نے ملک کی تقسیم اور تباہی کی بنیادیں رکھ دیں اور اس کی جڑوں کو ہلادیا۔
فتنہ انکار حدیث اور سید مودودی
حکومت کی سرپرستی میں اسلام دشمن قوتیں کام کر رہی تھیں."طلوع اسلام " رسالے اور ایوب خاں کی حکومت کے دوسرے دشمنِ اسلام اداروں کے ذریعے اسلام کے خلاف بہت ناروا کاروائیاں ہوتی رہتی تھیں۔ ایوب خان ان کی خوب سرپرستی کرتا تھا۔ اسی زمانے میں انکارِ حدیث کے فتنے نے بھی حکومت کی سرپرستی میں خوب زور پکڑا۔ کچھ لوگوں نے بھی کہنا شروع کردیا کہ اسلام میں حدیث کی کوئی حیثیت نہیں ہے اورہم اسے نہیں مانتے حتٰی کہ مغربی پاکستان کی عدالت کے ایک جج صاحب نے بھی حدیث کے بارے میں شک ظاہرکردیا اور اس کو اسلام میں سند ماننے سے انکار کردیا۔ یہ بہت خطرناک بات تھی کیونکہ تیرہ صدیوں سے مسلمان اسلام میں حدیث کوسند مانتے چلے آئے تھےاور کسی نے شک کا اظہار یا انکار کبھی نہیں کیاتھا۔ اس فتنے پر اگر خاموشی اختیار کی جاتی تو اس سے دین کو بہت ضعف پہنچتا۔ سید مودودی نے اس نازک وقت پر اسلام میں حدیث کی بنیادی حیثیت کو دلائل سےثابت کیا کہ جس طرح خدا اور اس کا رسولؐ، دونوں واجب الاطاعت ہیں اسی طرح خدا کا قرآن اور رسولؐ کی سنت بھی،دونوں اسلامی قانون کا سرچشمہ ہیں۔ انہوں نے فتنہ انکارِ حدیث پر آخری ضرب لگانے کے لیے اپنے رسالے "ترجمان القرآن"کا "منصب رسالت نمبر"بھی شائع کیا۔ یہ ایسا مدلل اور ایسی شاہ ضرب تھی کہ منکرین حدیث اس کا کوئی جواب نہ دے سکے۔ اس طرح فتنہ انکار حدیث کا تدارک کرکے سید مودودی نے ایک زبردست کارنامہ سرانجام دیا۔ انہوں نے حدیث کا انکار کرنے والوں کو شکست دی اور اس طرح قوم ایک زبردست فتنے سے محفوظ ہوگئی۔
قیدو بند اور ظلم و تشدد کا نیا دور
جس طرح بھیڑ کے لباس میں بھیڑیا بہت خطرناک ہوتا ہے۔ وہ باڑے میں گھس کر ساری بھیڑیں کھاجاتا ہےاسی طرح جمہوریت کے لباس میں آمریت بھی بہت خطرناک ہوتی ہے۔ ایوب خاں کا دستور ایسا ہی تھا جودراصل جمہوریت کے نام پر آمریت تھی۔ سید مودودی ایک کھرے ا ورسچےآدمی کی طرح صدرایوب کے تمام غلط کاموں پر اسے ٹوکا اور اس کی غیر اسلامی باتوں اور غیر شرعی حرکتوں کی مذمت کی۔ اس پرایوب خاں ان کے سخت خلاف ہوگیا۔ وہ اپنےوزیروں اور حکومت کے دوسرے لوگوں کے ذریعے جماعت اسلامی کو بدنام کرنےلگا۔ اس نے سید مودودیؒ کی مخالفت کرنے کے لیے باقاعدہ محکمے قائم کردیے۔ مولویوں کو خرید کر استعمال کیا۔ ہمارے ریڈیو اورخبارات توپہلے ہی پوری طرح حکومت کے قبضے میں ہیں اور ان میں دن رات حکومت کی تعریف اور حکومت کےمخالف لوگوں کی مخالفت ہوتی رہتی ہے چنانچہ ریڈیو دن رات سید مودودی کے خلاف پر و مپیگنڈہ کرنے لگا۔ انہیں گالیاں دی گئیں،اور ان پر جھوٹے الزام اور بہتان لگائے گئے۔ چونکہ ریڈیو ٹیلی ویژن میں زیادہ تر بے دین سوشلسٹ عناصر بھرے ہوئے تھے اس لیے انہوں نے بہتان بازی کی حد کردی اورسید مودودی اور جماعت پر اپنا ہرحربہ استعمال کیا۔
لاؤڈ سپیکر اور گولیاں
مارشل لاء اٹھنے کے بعد اکتوبر 1963ء میں سید مودودی اور ان کی جماعت نے اپنا سالانہ جلسہ لاہور میں منعقد کرنے کا فیصلہ کیا۔ ایوب خاں کی حکومت نے اس کو روکنے کی پوری پوری کوشش کی، یہ جلسہ لاہور کے منٹو پارک میں ہونے والا تھا لیکن حکومت نے وہاں جلسہ کرنے سے منع کردیا اور کہا کہ بھاٹی دروازے کے باہر والی تنگ جگہ میں جلسہ کرنے کی اجازت مل سکتی ہے۔ یہ جگہ لاکھوں انسانوں کے لیے بالکل ناکافی تھی، لیکن جماعت اسلامی کے کارکنوں نے بڑی محنت کے بعد وہاں جلسے کا انتظام کرلیا۔ اب ایوب خاں کے گورنر امیر محمد خاں آف کالا باغ نے لاؤڈ سپیکر استعمال کرنے کی اجازت دینے سے بھی انکا رکردیا۔ جماعت اسلامی نے اس کے بغیر ہی جلسہ کرنے کا فیصلہ کرلیا اور اپنی ساری کارروائی مکبروں کے ذریعے انجام دینے کا فیصلہ کیا۔ 25اکتوبر کو جلسہ شروع ہوا۔ سید مودودیؒ نے تقریر شروع کی تو ایوب خاں کے گورنر نے شراب میں بدمست کچھ غنڈے وہاں پہنچائے، جو چُھروں اور پستولوں سے مسلح تھے۔ وہ چاہتے تھے کہ جلسے کوخراب کرنے کے لئے لوگوں کو غصہ دلائیں۔ انہوں نے شامیانوں کی رسیاں کاٹیں،گولیاں چلائیں،جس سے جماعت اسلامی کا ایک کارکن اللہ بخش شہید ہوگیا۔ یہ کارکن گوفرہ ضلع لائل پور کا رہنے والا تھا۔ ان غنڈوں کا اصل نشانہ تو سید مودودی تھے، اس وقت سید مودودی سٹیج پر کھڑے تقریر کر رہے تھے، کچھ لوگوں نے سید مودودی سے کہا کہ غنڈے آپ پر گولی چلا رہے ہیں اس لیے آپ بیٹھ جائیں مگر وہ کوئی بزدل آدمی نہیں تھے۔ وہ تو اپنی زندگی اسلام کے لیے وقت کر چکے تھے۔ وہ تو پھانسی کی کوٹھڑی میں بھی مسکراتے رہے تھے۔ انہوں نے غنڈوں سےڈر کر بیٹھنے سے انکار کردیا۔ انہوں نے کہا کہ غنڈہ گردی کے مقابلے میں اگر میں بھی بیٹھ گیا تو پھر اس ملک میں کون کھڑارہ جائےگا۔ غرض سید مودودی ڈٹ کر سٹیج پر کھڑے رہے۔ اس پر ماہر نے کہا:
سید مودودی تیسری مرتبہ جیل میں
اپنی اس ناکامی پر ایوب خاں اور اس کے ساتھی بہت پریشان ہوئے۔ ان کا غصہ برابر بڑھتا چلا گیا۔ جماعت اسلامی کے خلاف پرپیگنڈہ بھی بہت سخت ہوگیا۔ ایک وزیر صاحب صرف جماعت کی مخالفت کے لیے وقف تھے اور وہ روزانہ پریس کانفرنس کیا کرتے۔ آخر کار ایوب خاں نے 6جنوری  1964ء کو جماعت اسلامی کو خلافِ قانون قرار دے دیا۔ سیدمودودی اور جماعت اسلامی کے پینسٹھ لیڈروں کو بے گناہ گرفتار کر کے جیلوں میں ڈال دیاگیا۔
حکومت نے جماعت کے رہنماؤں اور سید مودودی کو جیل میں پہنچانے کےبعد ایک لمبا چوڑا الزام نامہ شائع کیااور بڑے طمطراق سے پھیلایا۔ سید مودودیؒ نے بتایا:
"ہمارے مقدمے کی پیروی سو سے زائد وکلاء کر رہے تھے، جن میں مسٹر بروہی پیش پیش تھے۔ اس پیشے سے وابستہ  ارکان نے قانون کی بالاتری کو برقرار رکھنے کے لیے جس عظیم جذبے کا اظہار کیا وہ پاکستان کی تاریخ میں اس سے پہلے کبھی ظاہر نہ ہواتھا۔
انہوں نے بتایاکہ:
"سپریم کورٹ کے ججوں کا متفقہ فیصلہ یہی تھا کہ جماعت کے خلاف حکم امتناعی خلافِ قانون ہے۔ یہ فیصلہ ہمارے قانون کی تاریخ میں بڑی اہمیت کا حامل ہے۔ فی الحقیقت اسے تاریخ ساز فیصلہ کہا جاسکتا ہے"
جیل کی مصروفیت کے بارے میں انہوں نے بتایا:
"ہمارے رفقاء مختلف جیلوں میں تھے،سبھی کچھ نہ کچھ کرتے رہے،جب اکٹھے تھے تو درس قرآن و حدیث کا سلسلہ بھی جاری تھا۔ اس کے علاوہ ہر ایک کی مصروفیت الگ الگ رہی۔ میں نے چالیس سے چھیالیس تک سورتوں کی تفسیر بھی اسی جیل میں تحریر کی"
ایوب خاں کے زمانے میں کم از کم مجھے یہ تجربہ نہیں ہوا کہ پولیس یا جیل کے عملے نے میرے یا جماعت کے کسی فرد کے ساتھ کسی نوعیت کی بدتمیزی کی ہو"
نوماہ بعد اس قیدوبند سے بھی سپریم کورٹ کے فیصلے نے رہا کردیا اور جماعت 24گھنٹے کے اندراندر پورے ملک میں پھر بحال ہوگئی۔
سید مودودی معرکہ ستمبر میں
سید مودودی صرف بہادر عالم دین اور سیاسی رہنما ہی نہیں بلکہ جانباز مجاہد بھی تھے۔ انہوں نے تقسیم ملک کے وقت بھی دارالاسلام میں مسلمانوں کی حفاظت کی اور پہرے دیے۔ جب پاکستان کے ازلی دشمن بھارت نے مکاری سے ستمبر1965ء میں پاکستان پر حملہ کردیا تو سید مودودیؒ نے اپنے تمام اختلافات ختم کرکے اور حکومت کے اپنے اوپر مظالم کو بھلا کر ایوب خاں کی زیادتیوں کو معاف کر کے فی الفور جماعت اسلامی اور اپنی خدمات حکومت کو پیش کردیں۔
حکومت بھی سمجھتی تھی کہ سید مودودی کی بات میں بہت اثر ہے اور تمام دیندار اور سمجھ دارلوگ انہیں مانتے ہیں اس لیے حکومت نے قائداعظم کی وفات کے بعد پہلی بار سید مودودیؒ کو ریڈیو پر تقریر کرنے کی دعوت دی۔ حالانکہ اس سےپہلے اور اس کے بعد بھی یہ ریڈیو ہمیشہ سید مودودی کے خلاف الزامات اور جھوٹ ہی اچھالتا رہاتھا۔ حکومت اور اس کے وزیروں نے بھی ہمیشہ سید مودودی کو بدنام کرنے کے لیے یہی مشہور کر رکھا تھا کہ مودودی تو پاکستان کے خلاف تھے مگر اس موقع پر ساری دنیا نے دیکھ لیا کہ سید مودودی اور ان کی جماعت ہر مشکل وقت میں قوم کی خدمت کرتے ہیں. وہ لوگوں کوطبی امداد دیتے، نادار طلبہ کو چندے جمع کر کے وظائف دیتےاورجنگ ہو یا سیلاب ہر حال میں قوم کے کام آتے ہیں۔ سید مودودی اور ان کی جماعت نے کشمیر کی آزادی کے لیے جہادمیں بھی پوری طرح حصہ لیااور بھارت کے خلاف جہاد میں بھی۔ سید مودودی نے ریڈیوں پربھی بہت سی تقریریں کیں اور مسلمانوں پرزور دیا کہ وہ کفار کے خلاف جہاد میں پوری طرح حصہ لیں۔ دوسری طرف انہوں نے اپنی جماعت کو ہدایت کی کہ ہرکارکن اپنی اپنی ہمت کے مطابق جہاد میں حصہ لے۔ اس کے علاوہ دفاعی فنڈ کے لیے ملک بھرمیں روپیہ پیسہ بھی جمع کیاگیا۔ قوم اول روزسے جماعت اسلامی اور سید مودوی کوامین اور دیانتدارجانتی ہے۔ چنانچہ جماعت اسلامی نے متاثرین جنگ اور جہاد فنڈ میں لاکھوں روپے،برتن،کپڑےاوردوسرا سامان جمع کرکے حکومت اور مہاجرین جنگ میں تقسیم کیا۔ اس کے علاوہ کئی مقامات پر بیماروں اور مہاجرین جنگ کے لیے شفاخانےبھی قائم کیےجہاں سے جنگی بیماروں اور متاثرین جنگ کامفت علاج کیاجاتا رہا۔ خود سید مودودی نے آزادکشمیر کا دورہ کیا۔ جگہ جگہ جہادِ کشمیر کے حق میں تقریریں کیں. انہوں نے ریڈیومظفرآباد پر بھی ایک تقریر کی. جولوگ مقبوضہ کشمیر سے ہجرت کر کے آزاد کشمیر پہنچے تھے ان کے حالات سن کر انہیں تسلی دی اور جماعت اسلامی نے جس حد تک مکن ہوسکا ان کی پوری پوری مدد کی۔ بھارتی فوج نے اپنے مکارانہ حملے میں سرحدی علاقوں کی جو مسجدیں شہیدکردی تھیں جماعت اسلامی نے انہیں تعمیر کرنے کا انتظام بھی کیا۔ جب جنگ ختم ہوگئی اور امدادی کام مکمل ہوگئے تو سید مودوی کے ساتھ ایوب خاں کی حکومت کا رویہ پھر ویسا ہی ہوگیا جیسا پہلےتھا۔
1967ء میں عید کے چاند کے مسئلے پر ایوب خاں نے شریعت کا مسئلہ بتانے کے جرم میں سید مودودی کوپھرگرفتار کرلیا اور دو ماہ تک بنوں جیل میں رکھا۔ 2ماہ کی نظر بندی کے بعد انہیں رہا کردیا گیا۔ ایوب خاں چاہتا تھا کہ شریعت کا مسئلہ اس کے سرکاری مولوی ہی بتائیں اور سرکاری مولوی وہی کچھ بتاتے تھے جو ایوب خاں چاہتاتھا۔ وہ اسلام پر بھی کنٹرول کرناچاہتا تھا۔ ایوب خاں کا دور اسلام اور جمہوریت دونوں کے لیے تباہ کن دور تھا۔
فوجی راج میں انتشار
سید مودودی ملک کی بگڑتی ہوئی حالت پر سخت غمزدہ تھے۔ یحیٰی خاں نے اپنے اقتدار کو ایوب خاں کے نقش قدم پر چلتے ہوئے مزید طول دینے کے لیے مختلف بہانے بنانے شروع کردیے۔اس نے اعلان کیا کہ وہ نئے انتخابات کرائے گا اور پھر نیا دستور بھی بنائےگا۔ سید مودودی نے حکومت کو متنبہ کیاکہ نیاآئین بنانا اس انتشار کی حالت میں ممکن نہ ہوگااور مختلف مفادات رکھنے والے عناصر آپس میں جھگڑ کر ملک کو نقصان پہنچائیں گے۔اس لیے دستور سازاسمبلی بنانے کی بجائے قومی اسمبلی کا انتخاب کرایاجائےاور فی الحال معمولی ترمیم و اضافہ کے ساتھ 1956ء کے دستورکوہی نافذ کردیاجائے۔
انتخابات کا اعلان
عام انتخابات کے اعلان کے ساتھ ہی ملک میں سیا سی سرگرمیوں کاآغاز ہوگیا اور سیاست میں تشدد نے داخل ہونا شروع کردیا۔ جن عناصر نے مشرقی اور مغربی پاکستان میں فتنہ و فساد برپا کرکے یحیٰی خاں کو مارشل لاء لگانے کا موقع فراہم کیا تھا وہ پھر سرگرم عمل ہوگئے۔ جلسوں میں گڑ بڑ، گالی گلوچ،مارپٹائی اور سیاسی کارکنوں پر حملوں کا بازارہرطرف گرم ہوگیا۔ اشتراکی،سوشلسٹ، موقع پرست، قادیانی، بھارت کے ایجنٹ، روس اور امریکہ کے بہی خواہ غرض ہر ایک عنصر قوت و دولت کے ساتھ ایسا سرگرم ہوا کہ سیاست میں نظریہ پاکستان، اسلام، شرافت، اخلاق، دین غرض ہر چیز اس رو کی زد میں آگئی اور پورےملک میں اتنی افراتفری برپا ہوئی کہ ملک میں اسلام اور شرافت کامستقبل تاریک نظرآنے لگا۔ حد ہوگئی کہ لاہور اور ملتان میں قرآن پاک تک کو آگ لگا دی گئی اور ملک میں شیطانیت ننگا ناچ نانچے لگی۔ یحیٰی خاں کادور،دورِ انتشار تھا جس میں تاریخ کی طویل ترین انتخابی مہم چلائی گئی۔(1970ء کا پورا سال)
یومِ شوکت اسلام
اس موقع پر مشرقی پاکستان کے اشتراکی لیڈر مولانا بھاشانی نے پورے ملک میں اشتراکی انقلاب برپا کرنے کے لیے یکم جون 1970ء کو اعلان کردیا۔ تب سید مودودی نے اسلام کی عظمت و شوکت کا جھنڈا بلند کرنے کے لیے پورے ملک میں یومِ شوکتِ اسلام منانے کا اعلان کیا۔اس اعلان کے ساتھ ہی پورے ملک میں اسلام پسند قوتیں مستعد ہوگئیں۔ اگرچہ چند سیاسی عناصر نے سیاسی رقابت کی بنا پر اس کی مخالفت بھی کی لیکن 31مئی1970ء کوپورے ملک کے شہروں اور قصبات میں اتنے بڑے پیمانے پر شوکتِ اسلام مظاہرہ ہوا اور ملک بھر میں سینکڑوں اور ہزاروں کی تعداد میں جلوس نکلے جن میں کلمہ طیبہ کا ورد کیا گیا۔ ملک میں ایسا عظیم الشان اسلامی اجتماعات کا مظاہرہ اس سے پہلے کبھی نہ ہوا تھا۔ یہ دن پاکستان کی تاریخ میں یادگار رہے گا۔
تقسیم پاکستان کی سازش اور سید مودودی
جب مشرقی پاکستان میں بغاوت ہوئی تو بھارت نے باغیوں کی مدد کے لیے مشرقی پاکستان پرکھلم کھلا حملہ کردیا۔ اس وقت سید مودودیؒ اور ان کی جماعت نے ملک بچانے کے لیے بھارتی فوجوں، ہندوؤں اور سوشلسٹوں کامقابلہ کرنے کے لیے بڑی قربانیاں دیں لیکن بقول سید مودودی کے ملک نہ بچ سکا اور بھارتی فوج نے مشرقی پاکستان پر قبضہ کرلیا۔ ایک سازش کے تحت پاکستانی فوج کو حکم دے کر یحیٰی خاں نے بھارتی فوج کے سامنے ہتھیار ڈلوادیے جس سے ایک لاکھ سے زائد پاکستانی فوج اورشہری بھارت کی قید میں چلے گئے۔ مشرقی پاکستان کا علاقہ ملک سے زبردستی علیحدہ کردیا گیا اور 16دسمبر1971ء کو پاکستان دو ٹکڑے ہوگیا۔
تعمیر کی کوششیں
سید مودودی اسلام اور ملک کی خدمت کے لیے عمر بھر سر دھڑ کی بازی لگاتے رہے۔ انہوں نے اپنی ساری زندگی اسلام دشمنوں کے خلاف لڑنے اور اسلام کو ملک میں نافذ کرنے کی کوششوں میں صرف کی۔ آزاد پاکستان کے پورے عرصے میں حکمران جماعت سید مودویؒ اور ان کی جماعت کے خلاف طرح طرح کے مظالم کرتی رہی۔ سید مودودی کا بھروسہ ہمیشہ اپنے اللہ پر رہا۔ ان کی یہ امید ہمیشہ قائم رہی کہ ایک روز ملک میں مکمل اسلام نظام نافذ ہوکر رہے گا اور یہ ملک اسلامی نظام کے ذریعے ہی مضبوط اور مستحکم ہوگا۔
نومبر1972ء میں سید مودودی جماعت اسلامی کی امارت سےمسلسل خرابی صحت کی بنا پر علیحدہ ہوگئے۔اور ان کی زندگی کا کشمکش سے معمور ہنگامہ پرور دور ختم ہوگیا۔ اس طرح سید مودودی نے اپنی قوت و توانائی کی ساری زندگی اسلامی نظام برپا کرنے کی جدوجہد میں صرف کردی۔عزم وہمت اور عملی جدوجہد کےاعتبارسے سید مودودیؒ کی جوانی کادورایک نہایت ہی طویل دور ہے جو   1918  ء سے شروع ہر کر 1972  ء تک تقریبا 54  سال کے طویل عرصےپر پھیلا ہوا ہے۔ یہ طویل ترین جوانی کا دور ہے اس لیے کہ حقیقی جوانی عمر اور بال کی سیاہی و سفیدی یاجسم کی مضبوطی اور کمزوری پر منحصر نہیں ہے۔ جوانی مقصد زندگی،اس کے لیے جدوجہداور عزم وارادے کی پختگی،مضبوطی اور توانائی پر منحصر ہےاور حقیقت یہ ہے کہ سید مودودی کی جوانی نصف صدی سے زائد عرصے پر پھیلی ہوئی ہے اور وہ صدی کی طویل ترین جوانی ہے۔
بڑھاپا
سید مودودی کے بڑھاپے کا آغاز  4  نومبر  1972  ء کو ہواجب انہوں نے جماعت اسلامی پاکستان کی امارت سے علیحدگی اختیار کی۔ یہ علیحدگی انہوں نے ارکان جماعت سے اپیل کر کے حاصل کی جسے اکثریت نے قبول کرلیا۔ امارت سے علیحدگی کےلیےبیماری، بڑھاپے، ضعف و ناتوانی،جماعتی فرائض کی ادائیگی میں شدید جسمانی مشکلات کے مختلف عذراتِ شرعی موجود تھے۔ ارکان جماعت کی اکثریت نے ان کے عذرات کو قبول کیا .جنہوں نے یہ عذرات قبول نہ کیے ان کی بھی کافی تعداد تھی لیکن جماعت کے ضابطے کے آگے کسی کے لیے مجال دم زدن نہ تھی اور سید مودودی اپنی درخواست پر جماعت کی امارت سے رضاکارانہ طورپر علیحدہ ہوگئے۔ وہ  26  اگست  1941  ء کو امیر جماعت مقرر ہوئے تھے اور قیدو بند کے وقفہ کے علاوہ 31سال2ماہ اور8دن تک جماعت کی امارت پر رہنے کے بعد 4  نومبر  1972  ء کو ریٹائر ہوگئے۔ جس دن وہ باقاعدہ ریٹائر ہوئے ایک باقاعدہ تقریب منعقد ہوئی جس میں نئے منتخب امیر نے اپنے مستقبل کے عزم پر مشتمل ایک تقریر کی اور سید مودودی نے بھی اپنی الوداعی تقریرکی۔
بڑھاپے میں علمی مشاغل
سید مودودی کا بڑھاپے کا یہ دور بیشتر سیاسی مشاغل سے علیحدگی اور تصنیف و تالیف کے کاموں میں مزید انہماک کا دور ہے۔ انہوں نے سارا وقت تفہیم القرآن کی تصنیف و تالیف، نظرثانی، اس کی طباعت اور توسیع اشاعت پر مرکوز کردیا۔ جسے وہ مستقبل کا کام سمجھتےاور کہتے تھے۔ ان کا باقی وقت سیرتِ رسول اکرمﷺ کی تالیف پر صرف ہونے لگا،جوان کی دیرینہ آرزو تھی اور جسے وہ اپنی عمر بھر کے اس موضوع پرکیے ہوئے کام کی ترتیب و تدوین کے ذریعے انجام دے رہے تھے۔ اس کتاب کی قسط وار اشاعت رسالہ ترجمان القرآن میں ہوتی رہی ۔ ان کے علمی کارناموں سے محبت رکھنے والے ان کی اس عظیم کتاب کا انتظار بے تابی سے کرتے رہے۔
ان کے مشاغل میں عصر کے بعد کی ایک کھلی مجلس بھی تھی جس میں وہ اپنے ملاقاتیوں سے ملتے، ان سے باتیں کرتے،
ان کے سوالات کے جوابات دیتے اور ان سے تھوڑی دیر مل بیٹھ کر انہیں مطمئن کرتے۔ ان مجلسوں میں ملکی حالات پربھی روشنی پڑتی ۔علم وادب کی گتھیاں بھی سلجھائی جاتیں، تصوف کی باتیں بھی ہوتیں، تعلق باللہ اور فکر آخرت کا ذکر بھی ہوتا، مخالفین کے اعتراضات کے جوابات بھی دیےجاتے اور سب سے بڑی بات یہ کہ لطائف و سخن لطیف بھی مجلس کی نشاطِ روح کاسامان پیداکرتے۔ مجلس خوش خوش بیٹھتی اور مطمئن و مسرور اٹھتی۔
تفہیم القرآن
اس دور میں سید مودودی کا بیشتر وقت تفہیم القرآن کے کاموں پر صرف ہوتا۔ اسے وہ آئندہ نسل کے حق کی ادائیگی کہتے،اور ٹھیک ہی کہتے۔ بلاشبہ اس کی تالیف کے ذریعے انہوں نے آئندہ نسل کا حق ادا کردیا۔ داخلی اور خارجی دونوں پہلوؤں سے انہوں نے یہ ذمہ داری بہت خوبی سے ادا کی۔ چودھویں صدی ہجری میں اس عظیم کتاب کی تالیف نے اس صدی کو یادگار بنا دیا،اس عظیم علمی خدمت کو مسلمانوں کی تاریخِ علم وادب کبھی فراموش نہ کرسکےگی۔اس کتاب نے لوگوں کی زندگیوں کےرخ بدل دیے،یہ وہاں تک پہنچی جہاں تک سید مودودی کی دیگر تصانیف نہ پہنچ سکتی تھیں۔اس نے جدید طبقے کو بھی مسخر کیاہےاورقدیم طبقے نے بھی اقامت دین کا سبق اس کتاب سے سیکھا ہے۔ اسے پڑھ کر انسان کی زندگی قرآنی بحرذخار میں غوطہ زن ہوجاتی ہے۔
ایک دانشور کا چیلنج
مشہور دانشور مسٹر اے کے بروہی قانون کے عظیم اسکالراورعالمی سطح کے قانون دان تھے. ان کی قانون پر تصانیف عدالت ہائے عالیہ تک میں حوالے کے طور پر پیش کی جاتی ہیں۔ سید مودودی نے جب تشکیل پاکستان کے بعد آغازِ سفرکے طور پر ملک میں اسلامی دستور کا مطالبہ اٹھایا تو اس وقت ملک و ملت دونوں اسلام میں کسی نوعیت کے دستور کے تصور سے بے خبر تھے۔ نعرے کے طور پر بلاشبہ یہ کہہ دیاجاتا تھا کہ ہمارادستور قرآن ہے لیکن دستور کے جدید تصورات کے پیشِ نظر پورے قرآن کا دستور ہونا جس طرح ایک عامی مسلمان کو مطمئن کرسکتا ہے ایک قانون دان کو مطمئن نہیں کرسکتا۔ چنانچہ اِنھی ایام میں جناب بروہی صاحب نے یہ اعلان اخبارات میں شائع کرایا جو سید مودودی کے لیے ایک چیلنج کی حیثیت رکھتا تھا کہ جو شخص قرآن سے جدید دستورکی بنیادیں نکال کردکھائے اسے پانچ ہزار روپیہ انعام دیاجائے گا۔ ایک بندہ مومن کے لیے اس سے بڑا انعام توکوئی نہیں ہوسکتا کہ ایک بندہ خدا راہِ راست پر آجائے۔ چنانچہ سید مودودی نے "اسلامی دستورکی قرآنی بنیادیں"کے موضوع پر کراچی میں ہی تقریر کی اور قرآن میں سے کھول کھول کر جدید دستور کے مطابق حاکمیت سے لے کر بنیادی حقوق تک ساری دستوری بنیادیں قرآن سے نکال کر دکھادیں۔ اس کے بعد سے جناب بروہی سید مودودی کے علم وفضل کے پوری طرح قائل ہوگئے۔
سیرت رسول اکرمﷺ
سید مودودی تفہیم القرآن کی تیس سالہ طویل علمی مسافت طے کرنے کے بعد کمر کھول کر نہیں بیٹھ گئے۔ انہوں نے اپنے اول روز کے علمی منصوبوں کو سامنے رکھتے ہوئے تفسیر قرآن کے بعد حامل قرآن اور مجسم خلق قرآن حضوراکرم کی سیرت مرتب کرنے کے کام کا آغاز کردیا۔ اس سلسلے میں بعض علمی احباب نے مؤثر تعاون کیا اور سید مودوی کے لٹریچر خصوصاً تفہیم القرآن کی سورتوں کے دیباچوں اور حاشیوں میں سے سیرت، دعوت اور کارنامہ نبوت پر مشتمل بکھرے ہوئے بے شمار مواد کو اکٹھا کرکے مرتب کردیا جس سے ہزاروں صفحات پر مشتمل سیرت کی ایک ضخیم کتاب کاڈول ڈالا گیا اور پھر سید مودودی کے لیے بھی آسان ہوگیا کہ وہ سیرت کے اس ذخیرہ میں تاریخی اور واقعاتی ترتیب کا لحاظ رکھتے ہوئے خلا پُرکریں۔ سید مودودی نے تفہیم سے فراغت کے بعد یہ کام شروع کردیا۔ بلاشبہ یہ بھی ایک بھاری علمی کام ثابت ہوا جس کے سبب سید مودودی کے اوقات کا بڑا حصہ اس کام میں صرف ہونے لگا لیکن ساتھ ہی اس طریقے سے سیرت پر ایک قابل قدر تالیف بھی تیا رہوگئی جواردوادب میں اور سیرت النبیﷺ کے عظیم ذخیرے میں قابل قدر اضافہ ہے۔اس میں دعوت اسلامی اور عالمگیر دعوت کے موثرترین ابواب شامل ہیں۔
سید مودودی علیہ الرحمۃ کےبیرونی دنیا کے سفر اور کام
1956 ء سے لے کر 1974  ء تک کے عرصے میں آپ نے دنیا کے مختلف حصوں کا سفر کیا۔ اس دوران وہاں موجود مسلمانوں کوآپ سے ذاتی طور پر مستفیض ہونے اور آپ کی صلاحیتوں کا لوہا ماننے کا موقع ملا۔ دوسری جانب یہ سفرخودسید مودودی کے لیے بھی معلوماتی ثابت ہوئے۔ انہوں نے ان سفروں کے دوران دنیا کے ان حصوں کی زندگی کے حقائق کو بذات خود دیکھا اور لوگوں سے استفادہ کیا۔ اپنے متعدد دوروں کے دوران انہوں نے قاہرہ، دمشق،عمان، مکہ ،مدینہ،جدہ، کویت، رباط، استنبول،لندن،نیویارک،ٹورنٹوکے علاوہ کئی بین الاقوامی مراکز پر لیکچر دیے۔ انہی سالوں میں آپ نے 10عالمی کانفرنسوں میں شرکت کی۔
1959 ءاور  1960 ء میں قرآن پاک میں مذ کور مقامات کی جغرافیائی کیفیت کا مشاہدہ کرنے کےلیے سعودی عرب، اردن،(بشمول یروشلم)شام اور مصر کا تفصیلی مطالعاتی دورہ کیا۔ انہیں مدینہ یونیورسٹی کے قیام کے سلسلہ میں مدعو کیاگیا۔ اس یونیورسٹی کی اکیڈمک کونسل کے  1962 ء تک اس کے قیام سے رکن تھے۔آپ رابطہ عالم اسلامی کی فاؤنڈیشن کمیٹی کے رکن بھی تھے۔ اور اکیڈمی آف ریسرچ آن اسلامک لاء مدینہ کے بھی رکن تھے۔ مختصر یہ کہ سید مودودی مسلمانوں پراثرات کے حوالے سے ایک مینارہ نور تھے۔انہوں نے مسلمانوں کی فکرکو بالکل اس طرح متاثر کیا ہے جیسے ہمالیہ اور الپس اپنی جگہ سے ہلےبغیرایشیاء اور یورپ کے موسم اور آب و ہوا کو بدل کررکھ دیتے ہیں۔
غیر ملکی زبانوں میں تبلیغ اسلام
بیرون ملک بھی سید مودودی نے اسلام پاکستان اور مسلمانوں کی خدمات سرانجام دی ہیں۔ سید مودودی نے بے شمار کتابیں لکھ کر مسلمان قوم کو اسلام سمجھانے کی کوشش کی۔ یہ کتابیں بیشتر اردو میں ہیں لیکن سید مودودیؒ کی تصنیفات کا عربی،انگریزی،فارسی،ترکی، بنگالی،جرمن،فرانسیسی، ہندی،جاپانی، ساحلی، تامل،تلنگو سمیت بائیس زبانوں میں ترجمہ ہوچکا ہے۔ پوری دنیا انہیں ایک عظیم اسلامی مفکر،پختہ عزم مسلمان،اسلامی رہنما اور ایک بہت بڑے مصنف کی حیثیت سے جانتی ہے۔عرب ملکوں میں خاص طور پر تعلیم یافتہ طبقہ ان کا بے حد مداح ہےاوران کا بے حد احترام کرتا ہے اور انہیں"الاستاذمودودی" اور "السید مودودی" کہہ کر پکاراجاتا ہے۔ جبکہ مدینہ یونیورسٹی،ریاض،سوڈان،مصر اور دیگر کئی ممالک میں سید مودودی کی کتابیں نصاب تعلیم کا حصہ ہیں۔ انہوں نے مسئلہ کشمیر پربھی عربی زبان میں مختلف مضامین اور کتابچے لکھےاوراپنے وسائل سے انہیں عرب ملکوں میں پھیلایا اور یوں عرب مسئلہ کشمیر کی حقیقت سے آگاہ ہوئے۔ اس طرح ان میں پاکستان کے بارے میں جو غلط فہمیاں پائی جاتی تھیں، ان کو بھی دور کیا۔
بہت سے غیر مسلم سید مودودی کی کتابیں پڑھ کر مسلمان ہوئے۔ ان کی یہ کتابیں ہر پڑھنے والے کا دل اسلام کے لیے کھول دیتی ہیں۔ اسلام سمجھانے میں اللہ تعالیٰ نے سید مودودی کو ایک خاص ملکہ عطافرمایا تھا۔
دینِ اسلام کا سپاہی
سید مودودی دین اسلام کے عظیم مجاہد اور بہادرسپاہی ہیں۔ انہوں نےباطل کے طوفانوں میں بھی ہمیشہ اسلام کی بات کی ہےاور صرف اسلام کے لیے کی ہے۔ وہ ہر دور میں یہی کہتے رہے ہیں کہ اگر ملک میں اسلام نافذ کردیاجائے تو میں اسلامی نظام میں ایک چپڑاسی کی حیثیت سے بھی کام کرنے کوتیار ہوں۔ ان کے ایثار وقربانی کا یہ عالم تھا کہ انہوں نےاپنی لاکھوں روپے آمدنی والی کتابیں اسلام کےکام کےلیےوقف کردیں۔
سید مودودی کا پیغام
سید مودودی کا پیغام یہ ہےکہ
"قرآن کی دعوت لے کر اٹھو اورساری دنیا پر اس طرح چھاجاؤ جس طرح حضوراکرمﷺ اور ان کے ساتھی چھاگئے تھے"نئی نسل کےلیے بھی سید مودودیؒ کا یہی پیغام ہے۔
معبودِ حقیقی کی طرف کوچ
1979 ء میں سید مودودی کے گردے کی پہلے سے موجود خرابی بگڑ گئی اور اس پر مستزاد دل کی تکلیف تھی۔ آپ علاج کےلیےبفیلو، نیویارک چلے گئے جہاں ان کے بڑے سے چھوٹے صاحبزادے بطورمعالج کام کررہے تھے۔ بفیلو میں بھی آپ کی فکری مشغولیت جاری رہی۔ آپ رسول اللہﷺ پر مغربی مفکرین کے کام کو ملاحظہ کرتے یا پھر مسلم رہنماؤں، اپنے خیر خواہوں اور ہم خیالوں سے ملاقاتیں کرنے میں اپنا وقت گذارتے۔ آپ کے چندآپریشن بھی ہوئےمگر  76  برس کی عمر میں  22  ستمبر  1979  ء کو اس دارِ فانی سے کوچ کرگئے۔ انا للہ و انا الیہ راجعون ۔  . 

سوانح عمری مولانا مودودی رحمۃ اللہ علیہ۔۔۔ وڈیو کی صورت میں ملاحضہ فرمایئے۔۔

---

بذریعہ ای میل بلاگ پوسٹ

شاركه على جوجل بلس

عن Unknown